السلام علیکم ورحمۃ اللہ وبرکاتہ 
کیافرماتے ہیں علماء کرام و مفتیان عظام مسئلہ ذیل میں کہ کیا یہ واقعہ صحیح ہے کہ حضرت غوث اعظم رضی اللہ تعالیٰ عنہ کا بغیر وضو نام لینے والا ہلاک ہوجاتا تھا برائے کرم مع حوالہ جواب عنایت فرمائیں مہربانی ہوگی؛ 
سائل محمد فیضان رضا دھونرہ بریلی شریف 

وعلیکم السلام ورحمۃ اللہ وبرکاتہ 
بسم اللہ الرحمن الرحیم 
الجواب : جی ہاں درست ہے، گلزار معانی میں مذکور ہے کہ ابتداء میں آپ رضی اللہ تعالیٰ عنہ پر جلالیت کا بہت غلبہ تھا اور اس غلبہ کی یہ حالت تھی کہ جو شخص آپ رضی اللہ تعالیٰ عنہ کا نام بغیر وضو کے لیتا ہلاک ہوجاتا، 
ایک روز آپ رضی اللہ تعالیٰ عنہ کو سرکار دو عالم صلی اللہ تعالیٰ علیہ وسلم نے خواب میں فرمایا کہ عبد القادر اس حالت کو چھوڑ دو کیونکہ ایک ایسا زمانہ آنے والا ہے جس میں لوگ اللہ تعالیٰ اور میرا نام بھی بغیر ادب اور حرمت کے ذکر کریں گے تو آپ رضی اللہ تعالیٰ عنہ نے امت مصطفیٰ پر رحم فرمایا اور اس حالت کو ترک کیا- 
اور بعض حضرات فرماتے ہیں کہ جب غوث پاک کی یہ حالت مشہور ہوئی تھی تو لوگ موت کے خوف سے آپکا نام بغیر وضو کے نہ لیتے تھے تو بغداد کے اولیاء کرام نے حضرت غوث اعظم کی خدمت میں حاضر ہوکر عرض کیا کہ آپ لوگوں کے حال پر رحم فرمائیں اور اس سختی کو معاف فرما دیں تو آپ رضی اللہ تعالیٰ عنہ نے ارشاد فرمایا میں تو اس حالت کو پسند نہیں فرماتا کیونکہ اللہ تعالیٰ نے مجھے مخاطب کرکے فرمایا ہے کہ عبد القادر تو نے میرے نام کی عزت کی اور ہم تیرے نام کی عزت کریں گے اور جو عزت کرتا ہے وہ معزز بن جاتا ہے- 
مشائخ عظام فرماتے ہیں حو آپ رضی اللہ تعالیٰ عنہ کا نام بغیر وضو کے لیتا ہے وہ تنگ دستی اور مفلسی کا شکار ہوجاتا ہے اور جو آپکے نام کی نذر مانتا ہے اسے ضرور ادا کرنا چاہیے تاکہ کسی مصیبت میں گرفتار نہ ہوجائے - 
(بحوالہ تفریح الخاطر فی مناقب الشیخ عبد القادر مترجم ص:62/ قادری رضوی کتب خانہ گنج بخش روڈ لاہور ) واللہ تعالیٰ اعلم 

کتبہ؛ محمد اسرار احمد نوری بریلوی 
خادم التدریس والافتاء مدرسہ عربیہ اہل سنت فیض العلوم کالا ڈھونگی ضلع نینی تال اتراکھنڈ 

منجانب فخر ازھر گروپ